Бо мақсади ҳалли муаммои дастрасӣ ба оби нушокӣ дар маҳаллаи «Чашмаи арзана»-и шаҳри Хуҷанд ва тибқи дастуру супориши Раиси шаҳри Хуҷанд Маъруф Муҳаммадзода гурӯҳи корӣ таъсис дода шуд ва баъди баррасию таҳлили мушкилоти бо об таъмин намудани сокинони маҳалла масъалаи мазкур ҳалли мусбии худро ёфт. Аз оғози ҳафтаи равон сокинони ин маҳаллаи шаҳр 12 соат дар як шабонарӯз бо об таъмин гашта истодаанд. Бояд қайд кард, ки маҳаллаи мазкур то ин дам бинобар мавҷудияти қарзи хизматрасонии истифодаи барқ аз ҷониби корхонаи КВД «Садаф», дар як шабонарӯз ҳамагӣ ба мӯҳлати то 3 соат бо об таъмин буданд. Мувофиқи супориши Раиси шаҳри Хуҷанд маблағҳои иловагии истифодаи неруи барқи пойгоҳҳои обкашии КВД «Садаф», ки маҳаллаи «Чашмаи арзана»-ро бо оби нӯшокӣ таъмин менамояд минбаъд аз ҳисоби маблағи буҷаи маҳаллӣ пардохта мешавад. Назар ба таҳлили мутахассисон маблағи мазкур моҳе то 7 ҳазор сомониро ташкил хоҳад дод. Дар маҳаллаи мазкур 22 кӯча буда бештар аз 550 оила зиндагӣ менамоянд.
Манбаъ: сомонаи расмии МИХД-и шаҳри Хуҷанд
Нет комментариев