Ба мо зане бо номи Нигина (бо хоҳиши зан ном иваз карда шудааст) муроҷиат намуда, арз кард, ки ў оиладор буда, соҳиби 3 фарзанд мебошад. Аз аввали ҳаёти якҷояаш бо ҳамроҳии шавҳараш муносибаташ хуб буда, сипас бо мурури замон муносибати шавҳар ва аъзои оилаи шавҳараш бо зан дигаргун гаштааст, занро мунтазам шавҳараш зўроварии равонӣ мекардааст ва инчунин ҳатто мавриди лату кўб қарор дода, ба зан ҷароҳати ҷисмонӣ мерасонидааст.
Охирон маротиба шавҳараш бо зан бе сабаб ҷангу ҷанҷол карда, занро латукўб карда, занро бо ҳамроҳии 3 фарзандаш аз хона пеш кардааст. Сипас Нигина аз ҷароҳати бардоштааш дар беморхона бистарӣ гардида, ҳатто ҷарроҳӣ шудааст. Яъне, гурдаи зан сахт лат хўрда, қат шуда будааст.
Дар вақти дар беморхона бистарӣ гардиданаш шавҳар ва аъзои оилаи шавҳараш ба дидорбинии Нигина ҳатто ягон маротиба наомаданд. Нисбат ба ҳаракатҳои ғайриқонунии шавҳараш зан ба милитсия ариза пешниҳод кардааст.
Сипас нисбат ба шавҳари мизоҷ парвандаи ҷиноятӣ оғоз карда шуда, шавҳараш ба ҷавобгарӣ кашида шудааст.
Вале аз ҷониби шавҳари мизоҷ ягон намуди зарар ҷуброн карда нашудааст. Ҳамзамон, шавҳараш ба хона минбаъд занро роҳ намедодааст, инчунин барои таъминоти фарзандонаш ягон ёрии моддӣ нарасонидааст.
Нигина иброз намуд, ки барои ҷарроҳӣ карданаш аз бонк 3000 сомонӣ маблағ қарз гирифтааст ва алҳол маблағи қарзи гирифтаашро рўйпўш намуданаш зарур аст. Вале аз сабаби бад будани саломатиаш ва пурра барқарор набудани саломатиаш зан ҳоло ба кор баромада наметавонистааст.
Зан баъди аз беморхона баромаданаш ба марказ муроҷиат намуда, хоҳиш кард, то ин ки ба ў ёрӣ диҳем.
Сипас баъди ҷамъ намудани ҳуҷҷатҳои зарурӣ мо барои пешниҳод намудани даъво оид ба ситонидани алимент, аъзои оилаи молик эътироф кардан ва маскун ба манзили зисташ, ҳамчунин барои рўёнидани маблағи зарари расонидашуда ба суд даъво пешниҳод намудем, ки аз ҷониби суд ҳамаи даъвоҳои пешниҳодгардида, қонеъ карда шуданд.
Ҳамзамон, баъди барқароршудани саломатии Нигина мо ўро дар курси кўтоҳмуддати қаннодӣ, ки аз ҷониби Ассотсиатсияи миллии занони соҳибкори Тоҷикистон (АМЗСТ) ташкил шуда буд, дохил намудем, ки ў дар он ҷо дониш омўхт ва соҳиби сертификат гардид. Яъне, ин курси хондаи зан ба ў барои дар оянда баҳри дарёфт намудани ҷойи кор ва маблағ ҷиҳати пешбурди зиндагониаш зарур мебошад.
Сабоат Бобоҷонова,
корманди иҷтимоии Маркази занони «Гулрухсор»,
Хусрав Ўлмасов, продюсери мултимедиявӣ
Нет комментариев