Ҳукумати Ҷумҳурии Тоҷикистон ва Маҷлиси вакилони халқи вилояти Суғд номи баъзе аз маҳалҳои аҳолинишини шаҳрҳои Панҷакент, Конибодом ва ноҳияҳои Ашту Спитамени вилояти Суғдро дар иҷлосияи нуҳуми Маҷлиси миллии Маҷлиси Олии Ҷумҳурии Тоҷикистон иваз карда кард.
Аз ҷумла, дар шаҳри Панҷакент номи деҳаҳои Муғулони поён ба Сафобахш, Қизилҷар ба Зарринрӯд, Камартош ба Камардашт, Ҷомбулоқ ба Ҷомчашма, Тегирмонтеппа ба Осиёбтеппа, Кӯктош ба Кабудсанг, Қичик Шӯрнова ба Шӯроноваи хурд табдил дода шуданд. Бояд тазаккур дод, ки деҳаҳои мазкур дар ҳудуди деҳоти Амондара, Саразм, Косатарош ва деҳоти ба номи Халифа Ҳасан воқеанд.
Деҳаҳои Шаҳидқароянтоқ ва Яккатераки шаҳри Конибодом ба Диловарон ва Сафедорак табдили ном карданд. Инчунин деҳаҳои ноҳияи Ашт Қӯрғонча ба Қалъача ва Қамишқӯрғон ба Хуҷистон иваз карда шуданд. Деҳаи Оқтеппа ба Сафедтеппа, Фармонқӯрғон ба Фармонқалъа, Саидқӯрғон ба Саидқалъа ва Қӯштегирмон ба деҳаи Сариосиё дар ноҳияи Спитамен табдил ёфтанд.
Ҳадафи асосии иваз кардани номҳои маҳалҳои аҳолинишин татбиқи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон», эҳёи номҳои таърихӣ, ҷуғрофӣ, ки аз қадимӣ будани ин мавзеъҳо шаҳодат медиҳанд, ба шумор меравад.
Нет комментариев