Кормандони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон бо намояндагони Бозрасии давлатии автомобилии Вазорати корҳои дохилии Ҷумҳурии Тоҷикистон бо мақсади бартараф намудани сабабҳои ба садама алоқаманд ва беҳтар намудани бехатарии ҳаракат дар роҳ, махсусан ҳангоми истифода аз роҳҳои ағба ва кӯҳӣ миёни ронандагони таксиҳои шахсӣ корҳои таблиғотӣ роҳандозӣ намуданд. Дар ин бора аз Кумитаи ҳолатҳои фавқулода ва мудофиаи гражданӣ ба АМИТ «Ховар» хабар доданд.
Ҳангоми гузаронидани ин корҳо бо истифода аз мошини махсуси таблиғотӣ дар истгоҳҳои таксӣ, ки ба шаҳрҳои Хуҷанд, Хоруғ, Рашт, Лахш, Кӯлоб ҳаракат мекунанд, ба ронандагону мусофирон дар бораи ҳолати роҳҳои кӯҳӣ дар фасли зимистон ва садамаҳои нақлиётӣ наворҳо намоиш дода шуданд. Кормандони БДА оид ба риояи қоидаҳои ҳаракат дар роҳ ва меъёри суръат тавсияҳо доданд.
Зимни суҳбатҳо кормандони КҲФ ва МГ бори дигар хотиррасон карданд, ки ҳангоми гузаштан аз қитъаҳои тармахезу сангрез ҳушёр бошанд ва дар ҳолати рух додани ҳар гуна ҳолати фавқулода зуд ба кумак даъват кунанд. Ҳамзамон ба онҳо рақамҳои телефони воҳидҳои наҷоту имдодро доданд.
Ба ронандагон дар мавриди бемориҳои сироятӣ ва бахусус COVID-19, ки ҳоло ба сурати ҳамагир вуҷуд дорад ва ҳар лаҳза метавонад ба одамон сироят кунад, видеороликҳо намоиш дода шуданд. Дар ин наворҳо дар бораи қоидаҳои бехатарӣ ва риояи низоми беҳдошт ба хотири пешгирӣ аз сироят ба беморӣ бо ду забон: тоҷикӣ ва русӣ сухан мерафт.
Манбаъ: АМИТ «Ховар»
Нет комментариев