Дар шаҳри Душанбе ҷаласаи муҳокимаи ошкорои парламентӣ баргузор гардид, ки дар он намояндагон аз як қатор вазорату идораҳои мамлакат иштирок намуданд. Рӯзномаи ҷаласаи муҳокимаи парлумонӣ бо фарогирии танҳо як масъала — «Оид ба иҷрои буҷети давлатии Ҷумҳурии Тоҷикистон ҷиҳати татбиқи лоиҳаҳои таҷдид ва татбиқи лоиҳаҳои инвеститсионӣ дар раванди баровардани ҷумхурӣ аз бунбасти коммуникатсионӣ дар солҳои 2013-2014» дар вазорати нақлиёти Ҷумҳурии Тоҷикистон» аз ҷониби вакилон тасдиқ гардид. Раиси кумитаи Маҷлиси намояндагони Маҷлиси Олии Ҷумҳурии Тоҷикистон оид ба энергетика, саноат, сохтмон ва коммуникатсия Амир Катаев муҳокимаи ошкорои парлумониро ифтитоҳ намуда, аз таъкид дошт, ки корхонаю муасиссаҳои маҷмааи нақлиётӣ дар асоси дастуру супоришҳои Ҳукумати Ҷумҳурии Тоҷикистон ҷиҳати қонеъ гардонидани эҳтиёҷоти ахолӣ ва иқтисодиёти мамлакат ба хизматрасонии нақлиётӣ кори муайянеро анҷом додаанд. Соли равон дар 15 лоихаи инвеститсионӣ ба маблагӣ зиёда аз 560 миллион доллари амрикоӣ ва бо иштироки 2,4 хазор нафар мутахассисон, ки 62 дарсади онҳоро шаҳрвандони Тоҷикистон ташкил медиҳанд, корҳои татбикнамоӣ идома дода шуданд. Таъкид гардид, ки айни замон, дар Ҷумҳурии Тоҷикистон 220 корхонаи нақлиётӣ, 57 терминали мусофирбарӣ, 18 терминали боркашонӣ, 836 хатсайри мусофирбарӣ, инчунин 41 ширкати наклиёти байналмилалӣ дар соҳаи наклиёти автомобилӣ фаъолият намуда, интиқолдиҳандагони ватанӣ бо 26 давлати хориҷи дур ва 13 кишвари хориҷи наздик ҳамлу нақли байналмилалиро амалӣ мекунанд. Байни вакилони Маҷлиси намояндагон ва намояндагони Вазорати нақлиёти Ҷумҳурии Тоҷикистон саволу посухҳо сурат гирифт. Бо ҳамин муҳокимаи ошкорои парламентӣ ба анҷом расид.

Дар ин бора jahonnamo.tj хабар медиҳад.