Зиёда аз 180 000 сокини Хуҷанд, дувумин шаҳри бузурги Тоҷикистон, пас аз анҷоми корҳои тармимӣ дар истгоҳи обкашӣ мунтазам ба оби тозаи ошомиданӣ дастрас хоҳанд шуд.
Бино ба иттилоъи дафтари матбуотии Бонки аврупоии таҷдид ва трушд (БАТР), оғози корҳои барқарорсозӣ бо иштироки муовини аввали раиси шаҳри Хуҷанд Хайрулло Ғайбуллозода, раиси БАТР дар Тоҷикистон Рик Ишӣ ва муовини Директори Дафтари Швейтсария оид ба ҳамкорӣ (SECO) дар Тоҷикистон Ричард Ченевард баргузор гардид.
«Маблағҳои зарурӣ барои модернизатсия аз ҷониби БАТР ва SECO ҷудо карда шудаанд. Ин аввалин лоиҳаи мунисипалии пурра анҷомёфтаи БАТР дар Тоҷикистон аст ”, — қайд мекунад манбаъ.
Ёдовар мешавем, ки зимни сафари раиси намояндагии Бонки Аврупоии Таҷдид ва Рушд (БАТР) дар Тоҷикистон Рик Ишӣ ба шаҳри Хуҷанд ҷараёни татбиқи лоиҳа баррасӣ шуд.
Бино ба иттилоъи дафтари матбуотии дастгоҳи иҷроияи давлатӣ, раиси намояндагии БАТР дар Тоҷикистон Рика Ишӣ бо раиси шаҳр Фирдавс Шарифзода мулоқот кард. Дар ҷаласа ҳамчунин масъалаҳои татбиқи лоиҳаҳои давлатии сармоягузорӣ дар соҳаи технологияҳои рақамӣ, маблағгузории иқтисодиёти сабз, бахши хизматрасонӣ, сохтмони роҳҳо ва гармидиҳии автономӣ баррасӣ шуданд.
Аз рӯйи маводи Sugdnews.com
Нет комментариев