Мақомоти иҷроияи ҳокимияти давлатии шаҳри Хуҷанд мақсад дорад, ки баҳри рушди соҳаи иқтисодиёт, инъикоси имконияту иқтидорҳои мавҷуда ва ба ин восита, ҷалби сармоя ва соҳибкорони хориҷиву дохилӣ ба иқтисодиёти шаҳр портали сармоягузории мақомоти шаҳрӣ ташкил намояд.
Айни ҳол мутахассисони соҳа доир ба татбиқи лоиҳаи портали сармоягузории шаҳр кор мебаранд. Дар назар аст, ки ба наздикӣ ин портал фаъол гардида, иттилооти он оид ба имконияту иқтидорҳои маркази маъмурии Суғд тариқи шабакаҳои интернетӣ дастраси муштариёну сармоягузорон гардад.
Тавре ба хабарнигори АМИТ «Ховар» масъулин аз хадамоти матбуоти мақомоти иҷроияи ҳокимияти давлатии шаҳри Хуҷанд иттилоъ доданд, ҳоло дар минтақаи ҷанубу ғарбии шаҳр, дар майдони 320 га ҷиҳати тақвият бахшидан ба рушди иқтисодиёти мамлакат Минтақаи озоди иқтисодии «Суғд» таъсис ёфтааст. Ҳоло дар ин мавзеъ барои фаъолияти соҳибкорӣ ва сармоягузорӣ шароити имтиёзнок ва низоми махсуси иқтисодӣ муҳайё карда шудааст. То 1 июли соли 2018 дар ин минтақа 24 адад субъектҳо ба қайд гирифта шуда, ба фаъолият шурӯъ намудаанд.
Тибқи иттилои манбаъ, то имрӯз дар шаҳри Хуҷанд баҳри ҷалби сармояи дохиливу хориҷӣ, истифодаи мақсадноки захираҳои табиӣ ва неруи инсонии минтақа якчанд лоиҳаҳои инвеститсионӣ дар мисоли сохтмони коргоҳи коркарди пўст ба маблағи 12,5 млн доллари амрикоӣ, фабрикаи пойафзол ба маблағи 12,6 млн доллари амрикоӣ, коргоҳи истеҳсоли зарфҳои шишагин ба маблағи 17,0 млн доллари амрикоӣ, коргоҳи коркарди мева ва истеҳсоли консерва ба маблағи 11,7 млн доллари амрикоӣ, яхдону сардхонаҳои гуногунҳаҷм ба маблағи 3,1 млн доллари амрикоӣ, фабрикаи дорусозӣ ба маблағи 45,0 млн доллари амрикоӣ ва фабрикаи қаннодӣ ба маблағи 3,5 млн доллари амрикоӣ фаъолият доранд.
Нет комментариев