Размикори тоҷик Доробшо Наботов рӯзи 14-уми декабр дар шаҳри Кояни Кореяи Ҷанубӣ бо намояндаи Бразилия Матеус Камилё рақобат мекунад. Ин рақобат дар мусобиқаи ZFN 2 доир шуда, размикори тоҷикро зарур аст, ки ҳарифашро шикаст диҳад, то роҳаш ба ташкилоти бузург ҳамвор гардад.
Корномаи Наботов 9:0 аст ва ахиран дар як нишасти хабарии UFC дар Абу-Даби ҳозир шуд ва аз роҳбари ин созмон Дана Уайт хост, ки ба ӯ шонси мубориза дар ташкилоташро бидиҳад.
Дар ин мусобиқа роҳбари UFC Дана Уайт ҳузур хоҳад дошт ва агар намояндаи Тоҷикистон ғалаба ба даст орад, имкон пайдо мекунад, ки бо пурзӯртарин лигаи ҷаҳон қарордод бандад.
Наботов рақобати охирини худро муқобили Мурод Биларов моҳи ноябри соли 2023 дар мусобиқаи AMC Fight Nights 122 гузаронид. Ин рақобат тамоми вақти пешбинишуда сурат гирифта, бо қарори якдилонаи доварон ба фоидаи Доробшо анҷом ёфт.
Матеус Камилё охирин бор моҳи октябри соли равон дар мусобиқаи Tuff-N-Uff 139 муқобили Ҷонаски Соҷо нерӯсанҷӣ карда, бо қарори якдилонаи доварон пирӯзӣ ба даст оварда буд. Матеус 10 рақобат гузаронида, 8 ғалаба ва 2 бохт дорад.
Манбаъ: АМИТ Ховар
Нет комментариев