Бахшида ба Иди байналмилалии Наврӯз дар майдони аспдавонии ҷамъияти саҳомии ба номи Абдураҳим Ҷумъаеви ноҳияи Бобоҷон Ғафуров рузи якшанбеи 26 март мусобиқаи вилоятӣ оид ба пойга баргузор шуд.
Раиси вилояти Суғд Абдураҳмон Қодирӣ низ дар маросими кушодашавии чорабинии варзишӣ иштирок намуд. Муовини Раиси вилоят Ориф Хоҷазода иштирокчиёни чорабинии варзишӣ ва мардуми ҷамъомадаро ба Иди Наврӯз табрик гуфта, изҳор дошт, ки ҳар сол дар арафаи иди аҷдодӣ мусобиқаҳои пойгаву бузкашӣ баргузор мешавад ва мусобиқаҳои имрӯза 19-умин мусобиқа ба ҳисоб меравад.
Мусобиқаи вилоятии пойга дар 9 давр ҷараён гирифт ва дар он беш аз 70 асп иштирок намуд. Дар даври ниҳоӣ асп бо номи «Робенгуд» масофаи муқарраршударо аз ҳама пештар тай намуд. Ба ғолибони мусобиқаи вилоятӣ тӯҳфаҳои хотиравӣ ва ба ғолиби ҷои аввал 3 ҳазор сомонӣ супорида шуд.
Дар ин рӯз ҳамчунин мусобиқа оид ба чавгонбозӣ ва бузкашӣ доир шуда, ғолибон бо тӯҳфаҳо қадршиносӣ шуданд.
Нет комментариев