Бошгоҳи «Милан» дар бозии даври 6-уми марҳилаи гурӯҳии Лигаи қаҳрамонҳои УЕФА дар майдони худ «Ред Булл Залтсбург»-ро бо ҳисоби 4:0 шикаст дод. Вохӯрӣ дар варзишгоҳи «Сан-Сиро» (Ҷузеппе Меатсса) дар шаҳри Милан баргузор шуд.
Дар дақиқаи 14-ум ҳамлагари мизбонон Оливйе Жиру ҳисобро боз кард, ки ба он Сандро Тоналӣ ирсоли головар анҷом дод. Дар дақиқаи 46-ум нимҳимоятгари босниягӣ Раде Крунич бартарии «Милан»-ро дуболо кард. Пас аз 11 дақиқа дигарбора Жиру ба задани гол даст ёфт. Дар анҷоми вохӯрӣ ҳисоби ниҳоиро Жуниор Мессяс гузошт, ки ба ӯ Жиру ирсоли головар анҷом дод.
Дастаи Стефано Пиоли бо 10 имтиёз аз шаш бозӣ дар гурӯҳи «Е» дуввум шуд ва ба дар даври 1/8 ниҳоии Лигаи қаҳрамонҳо роҳ ёфт. “Ред Булл Залтсбург” бо 6 имтиёз дар зинаи севвум ба даври плей-оффи Лигаи Аврупо рафт.
Ёдовар мешавем ,ки «Милан» бори аввал дар 9 соли охир тавонист, ки ба плей-оффи Лигаи чемпионҳо роҳ ёбад. Охирон маротиба бошгоҳи шаҳри Милан дар мавсими 2013/14 ба даври плей-офф баромада буд.
Манбаъ: Варзиш-ТВ
Нет комментариев