Масъулони Вазорати нақлиёти Ҷумҳурии Тоҷикистон зимни нишасти матбуотӣ оид ба натиҷаи фаъолияти яксолаи худ маълумот дода, таъкид доштанд, ки ҳангоми сохтмон ва таҷдиди роҳҳои мамлакат ба сифат таваҷҷуҳи бештар зоҳир мекунанд, зеро роҳҳо ба мардум бояд садсолаҳо хизмат расонанд. Хайрулло Асозода Вазири нақлиёт гуфт, ки дар тӯли соли 2014 дар 15 адад лоиҳаи инвеститсионӣ ба маблағи 598,8 миллион доллари Иёлоти Муттаҳидаи Амрико корҳои татбиқнамоӣ идома дошт. Инчунин дар 5 иншоот, аз ҷумла сохтмони роҳи автомобилгарди Шоҳон–Зиғар марҳилаи 3, таҷдиди қитъаи 24 километраи роҳи автомобилгарди Данғара –Кангурт, азнавсозии роҳҳои ба нақби «Озодӣ» баранда, сохтмони терминали нав дар фурудгоҳи байналмилалии Душанбе, гузаргоҳи сарҳадии «Дӯстӣ» дар доираи лоиҳаи таҷдиди роҳи автомобилгарди Душанбе – Турсунзода ва хариди таҷҳизоти техника барои нигоҳдории роҳҳои автомобилӣ корҳои муҳим анҷом дода шудааст. Маблағи умумии иншооти анҷомёфта 115,6 миллион доллари Амрикоро ташкил намуд. Дар рафти корҳои сохтмон ва таҷдид барои аҳолӣ ҷойҳои корӣ муҳайё гардида, 2400 нафар, ки 62 фоизи онро сокинони мамлакат ташкил медиҳанд, ба кор ҷалб шудаанд.

Дар ин бора jahonnamo.tj  хабар медиҳад.