Дар Душанбе Рӯзи Парчами давлатии Ҷумҳурии Тоҷикистон бо шукӯҳу шаҳомати хосса ва баргузории силсилачорабиниҳо таҷлил мегардад. Дар ин бора аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд.
Ба иттилои манбаъ, тибқи қарори дахлдори Раиси шаҳри Душанбе Рустами Эмомалӣ, ки 19 ноябр ба имзо расид, ба ин муносибат 22 ноябр дар ноҳияҳои шаҳр маҷлисҳои тантанавӣ ва 24 ноябр дар Боғи Парчами давлатӣ ҷамъомади фарҳангӣ баргузор мегарданд.
Ҳамзамон Рустами Эмомалӣ масъулинро вазифадор намудааст, ки иҷрои саривақтии нақшаи чорабиниҳои вобаста ба ин ҷашнро дар пойтахти мамлакат таъмин намоянд.
Бояд гуфт, ки 24 ноябри соли 1992 дар иҷлосияи XVI Шӯрои Олии Тоҷикистон дар шаҳри Хуҷанд Парчами миллии Тоҷикистон қабул гардид, ки соли равон ба қабули он 27 сол пур шуд.
Рӯзи Парчами давлатии Тоҷикистон аз соли 2009 инҷониб бо Фармони Президенти Ҷумҳурии Тоҷикистон муҳтарам Эмомалӣ Раҳмон расман таҷлил карда мешавад.
Парчами давлатии Тоҷикистон аз се ранг — сабз, сафед ва сурх иборат буда, ранги сабз — сарсабзӣ, сафед роҳи сафед, хушбахтӣ, иқболи наку ва ранги сурх озодӣ ва мустақилиятро ифода мекунанд. Парчам дар радифи дигар муқаддасоти миллӣ- Конститутсия, Нишони давлатӣ ва Суруди миллӣ яке аз рамзҳои давлатдорӣ мебошад, ки аз ҳастии миллат ва давлати воҳид шаҳодат медиҳад.
Соли 2011 бо ташаббусу роҳнамоиҳои бевоситаи Сарвари давлат муҳтарам Эмомалӣ Раҳмон дар остонаи ҷашни 20-солагии Истиқлолияти давлатии Ҷумҳурии Тоҷикистон дар шаҳри Душанбе баландтарин парчам дар ҷаҳон, ки баландии сутунаш 165 метр мебошад, барафрохта шуда, ба Китоби «Рекордҳои Гиннес» ворид гардид.
Манбаъ: АМИТ «Ховар»
Нет комментариев