Дар вилояти Суғд баҳри иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати дастгирии оилаҳои камбизоат ва шахсони яккаву танҳо тадбирҳои зарурӣ андешида мешавад.
Пешвои миллат муҳтарам Эмомалӣ Раҳмон зимни мулоқоташон бо намояндагони ҷомеаи кишвар рӯзи 12 майи соли равон бо таъкиди он ки “Моҳи шарифи Рамазон ба сифати яке аз рукнҳои дини мубини ислом имтиҳони нафсу ҷисми саркаши инсонӣ буда, одамонро ба сабру таҳаммул, эҳтироми якдигар, раҳму шафқат ва кумак намудан ба эҳтиёҷмандону камбизоатон ҳидоят месозад”, масъулинро вазифадор намуда буданд, ки ҷиҳати дастгирии қишри ниёзманди ҷомеа дар моҳи шарифи Рамазон тадбирҳои заруриро амалӣ намоянд.
Роҳбарияти Мақомоти иҷроияи ҳокимияти давлатии вилояти Суғд маҳз бо мақсади иҷрои супориши мутазаккираи Пешвои миллат тасмим гирифт, ки ба 7600 оила, шахсони яккаву танҳо ва маъюбон кӯмакҳои моддӣ расонад. Аз ҷумла, дар шаҳру ноҳияҳои Айнӣ — 475, Ашт — 572, Бобоҷон Ғафуров — 925, Бӯстон — 66, Гулистон — 138, Деваштич — 631, Зафаробод — 257, Истаравшан — 908, Исфара — 552, Истиқлол — 25, Конибодом — 594, Куҳистони Мастчоҳ — 87, Мастчоҳ — 400, Панҷакент — 920, Спитамен — 206, Хуҷанд — 473, Ҷаббор Расулов — 276 ва Шаҳристон — 95 оила ва шахсони ниёзманд аёдат карда шуда, ба он кӯмакҳои моддӣ аз қабили орд, равған, шакар, биринҷ, расонида мешавад.
Аз ҷониби Раиси вилояти Суғд Раҷаббой Аҳмадзода нақшаи аёдати оилаҳои камбизоат ва шахсони низёманд тасдиқ гардида, тақсимоти кӯмакҳои моддӣ дар шаҳру ноҳия идома дорад.
Манбаъ: Хадамоти матбуоти Раиси вилояти Суғд
Нет комментариев