Дар доираи бозиҳои даври 14-уми қисми дуюми Чемпионати Тоҷикистон оид ба футбол миёни дастаҳои лигаи олӣ дастаи «Хуҷанд»-и шаҳри Хуҷанд дар майдони худ бо дастаи «Ҳосилот»-и ноҳияи Фархор қувва озмуда, бо ҳисоби калони 7:0 ғолиб омад.
Тавре аз Федератсияи футболи Тоҷикистон ба АМИТ «Ховар» иттилоъ доданд, дар ин вохӯрӣ соҳибони майдон ба дарвозаи «Ҳосилот» 7 голи беҷавоб заданд. Аз ҳайати дастаи ғолиб Давронҷон Тухтасунов ду гол зад. Ҳамчунин Манучеҳр Аҳмадов, Дилшод Бозоров, Фарҳод Тоҳиров, Эҳсон Бобоев ва бозингари нави дастаи «Хуҷанд» Ҷаҳонгир Эргашев як голӣ заданд.
Пас аз пирӯзии навбатӣ дастаи футболи «Хуҷанд» 24 имтиёз ба даст оварда, дар ҷадвали умумии мусобиқа мавқеи худро дар зинаи 2-юм устувор сохт. Ҳафтаи оянда бо баргузории даври 15-уми Чемпионати мамлакат баъзе аз бозиҳо 3 август оғоз ёфта, дастаҳои «Истиқлол» бо «Вахш» ва «Регар ТадАЗ» бо «Барқчӣ» қувваозмоӣ мекунанд. Дар ду бозии боқимондаи даври мазкур дастаи футболи «Ҳосилот»-и Фархор бо дастаи «КМВА Помир» ва «Хуҷанд» бо «Панҷшер» бо ҳам вомехӯранд.
Манбаъ: АМИТ «Ховар»
Нет комментариев