Тантанаҳои умумивилоятӣ бахшида ба Рӯзи байналмилалии оила имсол дар шаҳри Исфара баргузор гардид, ки дар он 40 оилаи намунавии шаҳру навоҳии вилояти Суғд низ иштирок намуданд. Муовини Раиси вилояти Суғд Назира Ғаффорӣ ва раиси шаҳри Исфара Расулзода Дилшод Ҷабборӣ якҷоя бо раиси Кумитаи кор бо занон ва оилаи назди Ҳукумати Ҷумҳурии Тоҷикистон Қосимзода Идигул Тағо, ва як гуруҳ шахсиятҳои шинохтаву барӯманди вилоят Биҳоҷал Раҳимова, Мавҷуда Бобоева, Гулафзо Савриддинова, Башорат Раҳимова бо гузоштани сабадҳои пургул бар пояи муҷассамаи Сайфуддини Исфарангӣ, ба мақому манзалати шоири зиндаёд дар сатҳи шоиста арҷ гузоштанд. Ширкат дар маҳфили ҷолиби идона, тамошои намоишгоҳи таваҷҷуҳангези ҳунарҳои мардумӣ ва барномаҳои ҷолиби фарҳангӣ, тақдими туҳфаҳои арзишманди хотиравӣ хушоянди ҳар яке аз ширкатдорони тантана буд. Раиси Кумитаи кор бо занон ва оилаи назди Ҳукумати Ҷумҳурии Тоҷикистон Қосимзода Идигул Тағо муборакбодии роҳбарияти мамлакат ва муовини Раиси вилояти Суғд Назира Ғаффорӣ табрикоти Раиси вилояти Суғд Абдураҳмон Қодириро ба самъи иштирокдорон расониданд. Шаҳрдори Исфара Дилшод Расулзода бо фараҳмандии афзун меҳмонони тантана – фаъолзанон, мудирони шӯъбаву бахшҳои кор бо занон ва оила, сабти асноди ҳолати шаҳрвандии шаҳру навоҳии вилоят, хосса 40 ҷуфти хушбахт — оилаҳои намунавии вилоятро, ки аз 10 то 50 сол зиндагии муштарак доранд, ба Исфараи бостонӣ хайрамақдам ва ба ифтихори Рӯзи байналмилалии оила самимона шодбош гуфт.
Манбаъ: www.sugd.tj
Нет комментариев