Духтарчаи 3-сола, ки дар маҳаллаи Гипроземи Душанбе ёфт шуда буд, пас аз се рӯз волидонашро ёфтааст.
Ҳошим Шарипов, як ошпази ошхонае дар “Бозори Деҳқон”, ки Сумайяро дар хонааш нигоҳ доштааст, дар суҳбат ба TojNews гуфт, шаби гузашта соати 00:14 волидони духтарча ҳамроҳи полис омаданд ва фарзандашонро бо худ бурданд.
“Сумая падару модарашро шинохт. Бо онҳо суҳбати тӯлонӣ надоштам, маълум буд, ки волидайни Сумая дар ҳолати шок буданд. Аз онҳо шунидам, ки бегоҳи рӯзи 11-уми апрел Сумаяро язнаааш ба сайру гашт бароварда, гум кардааст.”-мегӯяд Ҳошим Шарипов.
Бино ба гуфтаи Шарипов, 13-уми апрел як ҷавон ба ошхонаи онҳо омада, гуфтааст, ки ӯро дар ҳолати гиря дар маҳаллаи “военний городок”-и шаҳраки Гипрозем ёфтааст ва ба онҳо супурдааст.
“Дар ошхона будам, ки ӯро як ҷавон овард гуфт, ки дирӯз пайдо кардам як шаб дар хонаи мо буд дар ҳаминҷо истад. Гуфт, ки ба кор дер карда истодаам ва рафт. Ман ба радиои Ватан занг задам. Кормандони пулис омаданд, гуфтанд, ки ба кӯдакистон мебарем. Кӯдак, ки тарсида буд, хоҳиш кардам, ки як ду рӯз то пайдо шудани волидайнаш дар хонаи мо истад. Ба оилаам занг задам, омада ба хонаамон бурд. Бегоҳӣ аз кор баргаштам, ки бо духтарчаҳои худам бозӣ карда гаштаст…”, мегӯяд Ҳошим Шарипов.
Волидайни Сумайя, ки аз тақдири духтарчаи ғайбзадаашон аз расонаҳо огоҳӣ ёфтаанд, бо хабарнигорон дар бораи ин қазия суҳбат кардан намехоҳанд.
Манбаъ: http://www.tojnews.tj/
Нет комментариев