Вазорати нақлиёти ҷумҳурӣ бо мақсади қонеъ гардонидани муроҷиати шаҳрвандон бо истифода аз воситаҳои муосири коммуникатсия қабулгоҳи электронӣ ба роҳ монд.
АМИТ «Ховар» бо истинод ба Вазорати нақлиёти мамлакат иттилоъ медиҳад, ки ин тасмим мутобиқи Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» гирифта шудааст.
Қабулгоҳи электронӣ ба шаҳрвандон имкон медиҳад, ки ҷиҳати муҳокимаи масъала ва ё ҳалли мушкилот бо масъулини вазорат тамос гиранд. Акнун шаҳрвандон имкон доранд тавассути почтаи электронии вазорат бо суроғаи qabulgoh@mintrans.tj нома фиристода, ба роҳбари аввал ё муовинони ӯ савол диҳанд ва ё ба қабули бевоситаи онҳо худро номнавис намоянд.
Ҷавоб ба муроҷиаткунанда тибқи моддаи 18 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» давоми 30 рӯз омода мешавад. Посух ба саволҳои муҳим дар сомонаи расмии вазорат www.mintrans.tj ҷойгир мешавад, хабар медиҳад манбаъ.
Манбаъ: АМИТ «Ховар»
Нет комментариев