22 декабри соли равон дар Ҷамоати шаҳраки Навкати ноҳияи Спитамен маркази савдо ва хизматрасонии “Дӯстӣ” мавриди истифода қарор гирифт.
Дар маросими ба истифодадиҳии иншоот муовини якуми Сарвазири мамлакат Давлаталӣ Саид ва Раиси вилояти Суғд Раҷаббой Аҳмадзода ширкат варзиданд.
Бинои маркази савдо ва хизматрасонии “Дӯстӣ” аз ҷониби соҳибкори маҳаллӣ Муродҷон Каримов бунёд шудааст. Иншооти мазкур дар доираи омодагиҳо ба ҷашни 30 – солагии Истиқлолияти давлатии Ҷумҳурии Тоҷикистон бунёд шуда, аз ду ошёна иборат аст. Дар марказ маҳсулоти гуногуни зарурии рӯзғор ба фурӯш гузошта шуда, дар он панҷ нафар бо ҷойи корӣ таъмин шуданд.
Зимни ифтитоҳи иншоот таъкид гардид, ки имрӯзҳо чун дигар шаҳру ноҳияҳои ҷумҳурӣ дар ноҳияи Спитамен низ ба истиқболи ҷашни 30-солагии Истиқлолияти давлатӣ бунёдкориву созандагӣ ҷараён дошта, сокинон бо рӯҳияи болида барои таҷлили шоистаи ҷашни таърихӣ омодагӣ мебинанд.
Ба истиқболи ҷашни таърихӣ мувофиқи нақшаи чорабиниҳои мақомоти иҷроияи ҳокимияти давлатии ноҳия сохтмони 410 иншооти гуногун ба нақша гирифта шуда, то имрӯз 345 адади он ба истифода дода шудааст, ки дар натиҷа даҳҳо нафар соҳиби ҷойи корӣ гардидаанд.
Манбаъ: Хадамоти матбуоти Раиси вилояти Суғд
Нет комментариев