Бо ташаббуси бахши кор бо занон ва духтарони Донишгоҳи давлатии Хуҷанд ба номи академик Бобоҷон Ғафуров ба муносибати фаро расидани фасли баҳор дар Боғи истироҳатию фароғатии ба номи Камоли Хуҷандӣ ҳамоиши «Тоҷикона мепӯшем» баргузор шуд.
Тавре АМИТ «Ховар» бо истинод ба Донишгоҳи давлатии Хуҷанд хабар медиҳад, дар ҳамоиш 300 нафар занону донишҷӯдухтарон бо либосҳои миллӣ, аз қабили атласу адрас ва чакан иштирок намуданд.
Ҳадаф аз иқдоми «Тоҷикона мепӯшем»- арҷ гузоштан ба фарҳанги миллӣ ва анъанаҳои неки аҷдодӣ, махсусан либоси зебои миллӣ, атласу адрасу чакан, баланд бардоштани фарҳангу маданияти либоспӯшӣ, таблиғу ташвиқи либоси миллӣ ва аз байн бурдани тамоюли бегонапарастӣ мебошад.
Хотиррасон менамоем, ки дар асоси нақшаи чорабиниҳои Кумитаи кор бо занон ва оилаи назди Ҳукумати Ҷумҳурии Тоҷикистон иқдоми «Тоҷикона мепӯшем» дар тамоми гӯшаву канори ҷумҳурӣ идома дорад.
Нет комментариев