Бо мақсади ошноии наздик аз вазъи кору зиндагии сокинони дараи Яғноб Раиси вилоят Абдураҳмон Қодирӣ ба ин минтақа сафари корӣ анҷом дод. Дар оғози сафар Абдураҳмон Қодирӣ аз деҳаи Нумиткон ва деҳаи Таги Чинор дидан намуданд. Дар мулоқот бо сокинони водӣ Раиси вилоят ба вазъи зиндагӣ ва мушкилоти ҷойдоштаи ин мавзеъ таваҷҷуҳ зоҳир намуда, муроҷиату дархостҳои сокинони Яғнобро пазируфтанд. Ба масъулини сохторҳои дахлдор дастуру супоришҳо оид ба дастрас намудани мошини ёрии таъҷилӣ ба бунгоҳи тиббии Яғноб, ҷудо намудани 3 миллиону 500 ҳазор сомонӣ барои таъмиру азнавсозии роҳи мошингарди водӣ аз даромад то охирин деҳаи он ва ҳамзамон, ҷиҳати боз ҳам беҳтар намудани вазъи таъминоти барқ дар водӣ барои кашидани хатҳои иловагии барқ дода шуданд. Дар рафти мулоқот бо сокинон таъкид гардид, ки бахусус барои рушди туризм дар Яғноб тадбирҳои зарурӣ андешида шаванд. Зеро дар ин минтақа табиати нотакрор ва обу ҳавои тоза, манзараҳои дилфиребу обшорони руҳнавоз барои сайру саёҳат хеле мусоид буда, ҳамзамон таърихи зиндаи ниёгони мо, ки дар ин минтақа таҷассум ёфтааст, таваҷҷуҳи сайёҳону бостоншиносони зиёди хориҷиро ҷалб хоҳад кард.
Манбаъ: сомонаи расмии МИҲД-и вилояти Суғд
Нет комментариев