Дар МТМУ №5-уми шаҳри Хуҷанд даври дуюми Олимпиадаи фаннии хонандагони синфҳои 5-11 оғоз гардид, ки то санаи 8 ноябр идома меёбад.
Олимпиада аз фанҳои математика, биология, технологияи иттилоотӣ, забон ва адабиёти тоҷик, забони русӣ, забони давлатӣ, таърихи халқи тоҷик, география, асосҳои давлат ва ҳуқуқ, физика ва ғайра сурат гирифта, дар он зиёда аз 1400 нафар иштирок намуда истодаанд.
Ҷоиз ба зикр аст, ки дар олимпиадаи хонандагони муассисаҳои таҳсилоти миёнаи умумӣ, ки барномаҳои таълимиро дар сатҳи баланд аз худ намудаанд ва берун аз барномаҳои таълимии таҳсилоти умумӣ аз уҳдаи талаботи супоришҳои олимпиада мебароянд, иштирок менамоянд.
Мақсади асосии баргузор намудани олимпиада дарёфт ва рушди хонандагони болаёқатест, ки инкишофи зеҳнии онҳо ба самти фаъолияти илмӣ-таҳқиқотӣ нигаронида шудааст.
Дар даври дуюми олимпиада ғолибони даври аввал, яъне даври мактабӣ ширкат доранд. Дар сурати дар ин давр ғолибият ба даст овардан хонанандагон дар олимпиадаи вилоятӣ ва минбаъд ҷумҳуриявӣ иштирок хоҳанд намуд.
Ёдовар мешавем, ки дар соли таҳсили 2017-2018 дастаи мактаббачагони шаҳри Хуҷанд дар олимпиадаи вилоятӣ ба гирифтани 87 мақоми ифтихорӣ мушарраф гардиданд. Дар Олимпиадаи ҷумҳуриявӣ бошад, 31 нафар хонандагон соҳиби ҷойҳои ифтихорӣ гардиданд. Аз он ҷумла, 7 нафар соҳиби медали тилло, 9 нафар соҳиби медали нуқра ва 15 нафар соҳиби медали биринҷӣ, ки ин нишондиҳандаи беҳтарин дар миқёси вилоят мебошад.
Манбаъ: Дафтари матбуоти Раиси шаҳри Хуҷанд
Нет комментариев