Дирӯз дар толори китобхонаи вилоятии ба номи Тошхӯҷа Асирии шаҳри Хуҷанд дар асоси нақшаи кории Шӯрои машваратии Иттиҳодияҳои ҷамъиятии вилояти Суғд ҷаласаи гурӯҳ оид ба ҳамкорӣ бо ташкилотҳои ҷамъиятӣ баргузор гардид.

Дар ҷаласа роҳбарон ва намояндагони ташкилотҳои ҷамъиятӣ ва иттиҳодияҳо, иштирокчиёни барқароркунии садамаи Чернобил, Иттиҳодияи собиқадорони ҷанговарони интернатсионалист, намояндагони иттифоқи волидайни сарбозони вилоят, Иттифоқи ҷавонони вилоят, иттифоқи рассомон, Ассотсиатсияи милии соҳибкорзанон, донишҷӯёни мактабҳои олии вилоят ширкат намуданд.

Дар ҷаласа оид ба Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон, дурнамои имрӯзу фардо, нақши ҷомеаи шаҳрвандӣ дар баргузории чорабиниҳо бахшида ба соли 2015 «Соли оила», маъракаи муҳими сиёсӣ — интихоботи вакилони мардумӣ ба Парлумони кишвар ва маҷлисҳои маҳаллии вакилони халқ, ки рӯзи 1 март баргузор мегардад, иштироки шаҳрвандон дар интихобот ва ҳуқуқи конститутсионии онҳо маълумот дода шуд. Дар ин бора sugd.tj хабар медиҳад.