Каратечиёни тоҷик дар 12-ум мусобиқаи кушоди байналмилалии Бишкек (Қирғизистон) – “Bishkek Open-2019” — сазовори 9 медал гардиданд. Мусобиқа 8-10 феврал баргузор шуда, дар он 1100 варзишгар аз давлатҳои Қазоқистон, Қирғизистон, Россия, Тоҷикистон ва Ӯзбекистон иштирок намуданд. Ба иттилои Федератсияи каратэ-дои Тоҷикистон, ҷумҳурии моро дар ин мусобиқа 23 варзишгар дар синну соли гуногун намояндагӣ карда, ба гирифтани 9 медал – 2 тилло, 1 нуқра, 6 биринҷӣ — даст ёфтанд. Миёни наврасони 6-7-сола Илҳомҷони Муҳаммад байни писарон дар вазни -20кг ва Лутфинисо Ҷӯрабоева байни духтарон дар вазни +20кг сазовори медали тилло шуданд. Медали нуқраро миёни иштирокчиёни 16-17-сола Ҷаҳонгир Ҳомидов дар вазни -61кг соҳиб шуд. Миёни варзишгарони 8-9-сола Шукронаи Илҳомҷон (-25кг), 10-11-сола Дилшодбек Ҳайдаров (-30кг), 12-13-сола Алишер Султонов (-35кг), 14-15-сола Муҳаммад Фурқатзода (-52кг), Рустамҷон Муминов (-63кг) ва аз 18-сола боло Ҷавоҳир Ҳайдаров (+75кг) медалҳои биринҷиро ба гардан овехтанд. Ба ғолибону ҷоизадорон дар баробари медал ҷоизаҳои пулӣ низ тақдим гардид.
Манбаъ: ТВ Варзиш
Нет комментариев