Шоми дирӯз дар доираи бозиҳои даври 5-уми Ҷоми КФО-2018 дар гурӯҳи «D» дастаи футболи «Истиқлол»-и Тоҷикистон дар сафар дастаи футболи «Аҳал»-и Туркманистонро бо ҳисоби 1:0 мағлуб намуд.
Тавре аз Федератсияи футболи Тоҷикистон ба АМИТ «Ховар» иттилоъ доданд, ин дидор дар шаҳри Балканободи Ашхободи Туркманистон дар ҳузӯри мухлисони сершумор баргузор гардид. Фатҳулло Фатҳуллоев бозингари дастаи футболи «Истиқлол»-и Тоҷикистон дар дақиқаи 51-ум голи ягона дидори мазкурро ба ҳадаф расонид.
Ёдовар мешавем, ки дар бозии аввали марҳилаи гурӯҳии Ҷоми КФО-2018 дастаи футболи «Истиқлол»-и Тоҷикистон 7 марти соли равон дар Варзишгоҳи марказии шаҳри Ҳисор дастаи «Аҳал»-и Туркманистонро бо ҳисоби 1:0 шикаст дод. Аз рӯи натиҷаҳои 5 давр дастаи футболи «Истиқлол» бо 13 имтиёз садрнишини гурӯҳи «D» мебошад.
Манбаъ: Сомонаи расмии АМИТ «Ховар»
Нет комментариев