Кормандони шуъбаи Вазорати корҳои дохилӣ дар шаҳри Хуҷанд дар асоси муроҷиати ҷабрдидаҳо бо гузаронидани корҳои фаврӣ-ҷустуҷӯӣ гиреҳи силсиладуздии дар баландошёнаҳо содир шударо ошкор намуданд. Ба фарзияи тафтишот ҷабрдидаҳо худашон барои ҷиноят шароит фароҳам сохтаанд. Калиди ҳуҷраҳои баландошёнаро истиқоматкунандагон аз бепарвоӣ зери пояндози дар, ё дохили сипари барқӣ гузоштаанд, ки чунин ҳолат аз тарафи шаҳрванд Шаҳобиддини Мақсудбек, соли таваллудаш 1999, истиқоматкунандаи ноҳияи Мастчоҳ сӯиистифода шудааст. Кашфиёти ғайриоддии услуби ҷиноят имкон дод, ки давоми моҳи декабр гумонбаршаванда Шаҳобиддини Мақсудбек дар ҳудуди маҳаллаҳои 32 ва 33 шаҳри Хуҷанд рӯзона озодона ба чор ҳуҷра ворид шуда, пул ва дигар ашёи арзишмандро тасарруф намояд. Аз ҳаракатҳои ҷинояткорона 7 нафар хисороти моддӣ бардошта, натиҷаи зарар ба 28 ҳазору 880 сомонӣ баробар аст. Ҷабрдидагони 3 ҳуҷра донишҷӯёни иҷоранишин мебошанд. Аз ҳуҷраҳои онҳо аз 100 то 380 сомонӣ пули нақд, ноутбук ва телефонҳои мобилӣ дуздида шудаанд. Айни ҳол нисбат ба гумонбаршаванда Шаҳобиддини Мақсудбек бо моддаи 244 КҶ парвандаи ҷиноятӣ оғоз карда шудааст.
Манбаъ: сомонаи Mvd.tj
Нет комментариев