Як манбаи амниятӣ ба TOLOnews гуфт, ки таркиш дар натиҷаи ҳамлаи маргталаб бо истифодаи мошин — бомба ба неруҳои амнияти миллӣ рух додааст. Корбарони шабакаҳои иҷтимоӣ мегӯянд, ки садои он ба ҳадде баланд буд, ки онро дар бисёре аз нуқоти шаҳри Кобули Афғонистон шунидан мумкин буд, хабар медиҳад АМИТ «Ховар» бо истинод ба шабакаи телевизионии tolonews.com. ва рӯзномаи «8 Субҳ».
Манбаъ афзудааст, ки корвони мошинҳои амнияти миллӣ ҳангоми ворид шудан ба як шӯъбаи Раёсати амнияти миллӣ дар чорроҳаи «Шаҳид»-и шаҳри Кобул-пойтахти Афғонистон ҳадафи ҳамлаи маргталаб бо истифодаи мошин — бомба қарор гирифт.
Дар асоси хабари манбаъ, таркиш ҳатман талафот ва хисорот ба бор овардааст, аммо теъдоди дақиқ он маълум нест.
Дар иртибот ба ин ҳодиса рӯзномаи «8 Субҳ» бо истинод ба маълумоти Вазорати умури дохилӣ навиштааст, ки таркиши шадид соати 21:50 дақиқаи шаби сешанбе (20 апрел) дар чорроҳаи «Шаҳид» -и шаҳри Кобул рух дод.
Ҳамид Равшан, муовини сухангӯи Вазорати корҳои дохилӣ гуфтааст, ки дар натиҷаи таркиш панҷ нафар, аз ҷумла низомиён ва шаҳрвандон маҷрӯҳ шуданд, инчунин ба мошинҳо, фурӯшгоҳҳо ва хонаҳои маскунии атрофи маҳали ҳодиса зарари калони молӣ расонда шудааст.
Касе ё гурӯҳе масъулияти таркишро бар дӯш нагирифтааст.
Манбаъ: АМИТ «Ховар»
Нет комментариев