Бонки миллии Тоҷикистон сиёсати пулию қарзии шаффоф ва пайгиронаро амалӣ намуда, истифодаи фишангҳои монетарӣ ва асъорӣ, пеш аз ҳама меъёри бозтамвилро ҷиҳати танзими ҳаҷму арзиши пул ва бартараф намудани таъсири фишорҳо ба сатҳи нархҳо ва ба ин васила ноил гардидан ба ҳадафи мақсадноки таваррум равона карда истодааст. Тибқи маълумоти омори расмӣ дар Тоҷикистон сатҳи таваррум дар моҳи декабри соли ду ҳазору ҳабдаҳ ба 0,3 фоиз баробар гардид. Қайд кардан ба маврид аст, ки сатҳи таваррум дар маҷмӯъ зери таъсири омилҳои мавсимии кӯтоҳмуддат қарор дошта, он асосан дар натиҷаи болоравии нархи баъзе аз маҳсулоти хӯрокворӣ ба вуқӯъ омад. Дар сохтори таварруми ҳосилшуда, дар моҳи декабр бештар қиматшавии нархи ангур 44,9 фоиз, бодиринг 14,8 фоиз, тухм 4,7 фоиз ва гази моеъ 13,8 фоиз саҳмгузор буданд. Ҳамзамон, дар ин моҳ нархи сабзӣ 16,6 фоиз, карам 8,3 фоиз, шакар 4,0 фоиз ва гӯшти гов 2,1 фоиз раванди коҳишёбӣ доштанд Сатҳи таваррум дар соли 2017, аз сатҳи нишондиҳандаи мақсаднок барои давраи миёнамуҳлат муайяншуда (7,0 фоиз) андаке пасттар ҷамъбаст гардида, ба 6,7 фоиз баробар шуд.
Диаграммаи 1. Нишондиҳандаи мақсадноки таваррум барои давраи миёнамуҳлат
Манбаи акс сомонаи расмии Бонки Миллии Тоҷикистон
Ба ин раванд пеш аз ҳама сиёсати фаъоли зиддитаваррумии монетарӣ, сатҳи муътадили талаботи дохилӣ, нисбатан ба эътидол омадани қурби пули миллӣ ва коҳишёбии интизориҳои таваррумӣ дар нимаи дуюми сол таъсири мусбат расонид. Саҳми маҳсулоти хӯрокворӣ дар таварруми солона аз ҳама зиёд 4,3 банди фоизӣ, маҳсулоти ғайрихӯрокворӣ 1,2 банди фоизӣ ва хизматрасониҳо 1,2 банди фоизиро ташкил намуд.
Манбаъ:сомонаи расмии Бонки Миллии Тоҷикистон
Нет комментариев