Бо ибтикори мақомоти иҷроияи ҳокимияти давлатии вилоят рӯзҳои 30 ва 31 декабр бо мақсади таъмини фаровонии дастархони мардум дар арафаи Соли нави мелодии 2022 ярмарка-фурӯши маҳсулоти кишоварзӣ доир мегардад.
Имрӯз дар маркази вилоят ярмарка-фурӯши маҳсулоти кишоварзӣ оғоз ёфта, дар он картошка, пиёз, биринҷ, сабзӣ, равған, шакар, орд, гӯшти гову гӯсфанд, гӯшти паранда, гӯшти моҳӣ, сабзавоту полезиҳо, меваҳои гуногун, маҳсулоти нониву гӯштӣ, шириниву консерва, нӯшокиҳо, туҳфаҳои солинавӣ бо нархҳои нисбат ба бозор арзон пешниҳоди мардум карда шуд.
Раиси вилоят Раҷаббой Аҳмадзода аз ярмаркаи мазкур боздид карда, таъкид намуд, ки бо мақсади таъмини иҷрои супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон чунин ярмаркаҳо мунтазам гузаронида мешавад. Дар арафаи Соли нав дар шаҳрҳои саноатии Бӯстону Гулистон ва Истиқлол низ ярмарка-фурӯши маҳсулоти кишоварзӣ ташкил гардида, барои дастрасии сокинон бо маводи ғизоии арзонтар тадбирҳои зарурӣ андешида хоҳад шуд.
Раиси вилоят ба масъулин супориш дод, ки танзими нархи маҳсулоти пешниҳодшавандаро зери назорат қарор дода, барои дар сатҳи баланд гузаронидани ярмаркаҳо дар шаҳрҳои Бӯстону Гулистон ва Истиқлол низ чораҷӯӣ намоянд.
Манбаъ: Хадамоти матбуоти Раиси вилояти Суғд
Нет комментариев