Бозиҳои даври 13-уми чемпионати Тоҷикистон оид ба футбол миёни дастаҳои лигаи олӣ баргузор шуданд.
Тавре аз Федератсияи футболи Тоҷикистон ба хабарнигори АМИТ «Ховар» иттилоъ доданд, дар бозии марказӣ дастаи футболи «Регар-ТадАЗ»-и Турсунзода дар майдони худ бар дастаи футболи «Куктош»-и ноҳияи Рӯдакӣ бо ҳисоби минималии 1:0 ғалаба кард. Голи ягонаро Бахтиёр Қаландаров дар дақиқаи 82-юм ба ҳадаф расонид. Бохти дастаи футболи «Куктош»-ро дастаи футболи КМВА «Помир» натавонист истифода барад. Бозии ин даста бо дастаи футболи «Панҷшер» бидуни гол анҷом ёфт.
Мухлисони футбол рӯзи 5 август шоҳиди ду бозии дигари даври 13-ум шуданд. Муддаиёни медалҳои тиллои чемпионати имсола – «Истиқлол» ва «Хуҷанд» дар меҳмонӣ ба пирӯзӣ даст ёфтанд. Дастаҳои «Истиқлол» бар дастаи «Барқчӣ» (1:0), «Хуҷанд» бар дастаи «Хатлон» (2:1) ғалаба карданд. Голи дастаи «Истиқлол»-ро Дилшод Восиев дар дақиқаи 31 вориди дарвозаи ҳариф кард. Дар дидор миёни дастаҳои «Хуҷанд» – «Хатлон» дар нимаи аввал Кароматулло Саидов – бозингари дастаи Бохтар ҳисобро кушод. Дар нимаи дуюм хуҷандиҳо ду гол заданд. Дар дақиқаи 56 легионери узбекистонии дастаи «Хуҷанд» ҳисобро баробар карда, дар дақиқаи 90+5 Манучеҳр Ахмедов аз пеналтӣ голи ғалабаоварро ба нишон расонид.
Ёдовар мешавем, ки бозиҳои даври чордаҳум 18-19 август баргузор мешаванд. Дар даври охирини марҳилаи дуюм дастаҳои футболи «Куктош» бо «Панҷшер», «Регар-ТадАЗ» бо «Барқчӣ», «Хуҷанд» бо КМВА «Помир» ва «Истиқлол» бо «Хатлон» вомехӯранд.
Нет комментариев