Бахшида ба Соли ҷавонон раисони шаҳру ноҳияҳои вилояти Суғд бо донишҷӯёне, ки дар маркази вилоят, шаҳри Хуҷанд таҳсил менамоянд, мулоқот баргузор мекунанд. Тибқи ҷадвали тасдиқгардида вохӯрии раисони шаҳру ноҳияҳои вилоят бо донишҷӯёни шуъбаҳои рӯзонаи муассисаҳои таҳсилоти олӣ ва миёнаи касбии маркази вилоят аз 1 декабри соли равон оғоз ёфта, то 14 декабр идома меёбад. Дар асоси ҷадвали тасдиқшуда Раёсат ва шуъбаҳои дахлдори Мақомоти иҷроияи ҳокимияти давлатии вилояти Суғд вазифадор карда шудаанд, ки ҷиҳати дар сатҳи баланд гузаронидани мулоқотҳо тадбирҳои зарурӣ андешанд. Иқдоми мазкур бо мақсади бохабар гардидан аз вазъи таҳсил, зисту зиндагонии донишҷӯён ва кумак ба донишҷӯён аз оилаҳои камбизоат амалӣ мегардад. Дар доираи мулоқоти раисони шаҳру ноҳияҳо барои донишҷӯён ҳамчунин ташкили чорабинии фарҳангӣ, дастурхони идона ва расонидани кумакҳо дар назар дошта шудааст.
Манбаъ: сомонаи расмии МИҲД-и вилояти Суғд
Нет комментариев