Аз сеюм то шашуми августи соли 2017 дар вилояти Суғд Форуми ҷумҳуриявии намояндагони ҷавони вазорату идораҳо ва ташкилоту муассисаҳо ва дигар қишри ҷавони мамлакат таҳти унвони «Ҷавонон пайрави Пешвои миллат» баргузор мегардад.
Дар Форуми мазкур, ки бахшида ба “Соли ҷавонон” доир мешавад, иштироки 150 нафар ҷавонон аз тамоми вазорату идораҳо ва ташкилоту муассисаҳои кишвар дар назар аст.
Тибқи барномаи форум рӯзҳои баргузорӣ чорабиниҳои фарҳангӣ- фароғатӣ, мулоқоту вохӯриҳои сатҳи баланд, аксияҳо ва саёҳати иштирокчиён ба мавзеъҳои таърихию сайёҳии вилояти Суғд ва мусобиқаҳои варзишӣ дар нақша гирифта шудааст. Дар доираи Форуми мазкур ҳамзамон баргузории конфренсияи илмӣ-назариявӣ дар мавзӯи “Нақши Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар амалӣ намудани сиёсати давлатии ҷавонон” дар назар дошта шудааст.
Ҷоиз ба зикр аст, ки Форуми мазкур дар доираи Нақшаи чорабиниҳо бахшида ба “Соли ҷавонон”, ки бо Амри Президенти Ҷумҳурии Тоҷикистон аз 8 феврали соли 2017, №АП-833 тасдиқ шудааст аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Мақомати иҷроияи ҳокимияти давлатии вилояти Суғд баргузор карда мешавад.
Манбаъ: Хадамоти матбуоти Раиси вилояти Суғд
Нет комментариев