Имрӯзҳо ҳайати эҷодии ШТРР «Тироз» дар ҷустуҷӯӣ навовариҳо буда,  пайваста кӯшиш ба харҷ медиҳад, ки барномаҳои ҷолибро барои болида гардонидани табъи ҳаводорону шунавандагонаш рӯи кор оварад.  Аз субҳ ровиён мухлисонро бо субҳи тозаву умедбахш шодбош гуфта, онҳоро бо навиду рӯйдодҳои ҷолиб ошно сохта, сурудҳои дилнавозро барояшон эҳдо менамояд.

Хотиррасон бояд намуд, ки шунавандагон барномаҳои моро метавонанд тариқи онлайн дар сомонаи www.tiroz.org  гӯш карда, дар бахшҳои мухталиф маълумоту маслиҳатҳои муфидро ба даст оранд. Барномаи иттилоотии «Ахбор», ки ҳадафи ҳамаррӯза шунавандагонро бо хабару рӯйдодҳои наву тоза ошно сохтанро дорад, акнун бо тарзи нав пешкаши шунавандагону истифодабарандагонаш хоҳад гардид.

Кунун  барномаи мазкур  дар  таҳияи ҳамкоронамон Эшқул Файзуллоев  ва Мавзуна Ниёзова омода гардида, ровиёни мо Шуморо бо навгониҳо, рӯйдоду воқеаҳои муҳиму фаврӣ ошно хоҳанд сохт. Агар хоҳед, ки ҷаҳонбинии худро сайқал диҳед, аз навгониву хабарҳои саривақтӣ шиносоӣ пайдо намуда, ҳамқадами замона бошед, аз субҳ барномаҳои моро ҳамроҳӣ кунед.